Katersisussaatitaaneq 2021

Pisussaaffigalugu soraarnerussutisiassanut katersisussaatitaanermut akiliisarpit

Akileraarnermik Aqutsisoqarfik ukiut tamaasa akileraarutinut innaarummik naatsorsuutinik akileraartartunut nassiussisarpoq. Innaarummi soraarnerussutisiassanut ikioraanitit allaqqassapput, inatsillu malillugu katersisussaatitaanermi minnerpaaffissaa qaangerlugu katersisimanerlutit.

Inatsisit qanoq ippat?

18-inik ukioqaleruit Kalaallit Nunaannullu tamakkiisumik akileraartussaatitaallutit soraarnerussutisiassanut katersisussaatitaalissaatit. Ileqqaartussaatitaanerit nalinginnaasumik (pisortatigoortumik) ukiut soraarninngorfissat ukiunik sisamanik sioqqullugu taamaatissaaq. Kalaallit Nunaanni 2021-imi pisortatigoortumik soraarninngorfissaq 67-inik ukioqalermermiuvoq. 2021-miit ileqqaartussaatitaanerit taamaattumik ukioq 63-iliiffiit aallarnerfigalugu taamaatissaaq. Soraarnerussutisiaqalernissannut ileqqaagaqarnerit soorunami ingerlatiinnarsinnaavat. Inatsisitigulli tamanna piumasaqaataanngilaq.

Innuttaasut piffissami sivikinnerusumi Kalaallit Nunaanniittut danskit Kalaallillu Nunaanni soraarnerussutisiaqalernissamut aaqqissuussinermut ileqqaagaqarnissamut peqataannginnissamut qinnuteqarsinnaapput. Peqataannginnissamut akuerineqassagaanni Islandimeersuuneq, Savalimmiuniit, Norgimiit imalt. EU-mi nunat arlaanneersuunissaq taakkunanilu ileqqaagaqartuunissaq piumasaqaataavoq.Tamatumalu saniatigut qinnuteqarninnut atatillugu nalunaarutigissavat ukiut aningaasarsiorfiusut marluk (ullorsiutit malillugiunngitsoq) sinnernagit maaniinnissat naatsorsuutigigit. Akileraartussaatitaanerpit atuutilerneraniik kingusinnerpaamik qaammatit pingasut qaangiutsinnagit peqataannginnissamut Akileraartarnermut Aqutsisoqarfimmut qinnuteqarsinnaavutit.

Soraarnerussutisiaqalernissamut aaqqissuussinermut toqqortuinissat illit nammineq akisussaaffigivat.

SISA-mi soraarnerussutisiaqalernissamut aaqqissuussinermik pigisaqareeruit inatsimmilu piumasarineqartumit procent-imik anginerusumik toqqortuillutit qanoq iliuuseqartariaqanngilatit. Inatsimmi piumasaqaataasoq taamaalillutit naammassinikuugakku.

Soraarnerussutisiassannik aaqqissuussiffigineqarsimanngikkuit Akileraarnermut Pisortaqarfiup ukiakkut ukiup akileraarfiup qaangiunneratigut pisussaaffigalugu soraarnerussutisiassannut akiliutissat akilertittussaavaa. Tassa imaappoq siullermik 2019-ip ukiaanerani 2018-ip ingerlanerani toqqortugassaraluatit akilersinneqassapput.

Pisussaaffigalugu soraarnerussutisiassanut katersinissamut aaqqissuussineq pillugu Sulisitsisut-nit Grønlands Erhverv aamma Akileraartarnermut Aqutsisoqarfik-up Skattestyrelsen quppersagaliaanni takuneqarsinnaapput.

Videonik paasissutissiinerit

Akileraarnermik Aqutsisoqarfiup nittartagaani takusinnaavat tassunga tunngasut videonik paasissutissiinerit sisamat.

Akissarsialik

Malugalugu inatsimmi soraarnerussutisiassatut akiliutissat / toqqortigassat naatsorsorneqartarmat isertitatit tamakkiisut tunngavigalugit – ileqqaarnissamut tunngavissatut taaneqartumik. Ileqqaarnissamut tunngavissat tassaapput akileruutissatut isertitat tamarmik, tassani pineqarlutik akileraarutissatut A –tut isertitat aamma akileraarutissatut B –tut isertitat. Tassa imaappoq; aamma ilanngullugit akiliutigineqartussanut naatsorsuunneqassapput akeqanngimik inigisamut, biileqartitaanermut, telefon-eqartitaanermut, internet-eqartitaanermut il.il. naligitinneqartut.

Nalinginnaasumik soraarnerussutisiassannut akiliutissappit naatsorsorneqarnera pissaaq akissarsiappit (A-tut isertitat) procentianit tunngaveqartumik. Akissarsiappit saniatigut allanik isertitaqarsimaguit ileqqaarnissamut tunngavissat anginerussapput. Taamaattoqartillugu soraarnerussutisiassannut toqqortuininnut akiliutissat nalinginnaasumik akissarsiatit tunngavigalugit akiliuatissanniit anginerussaaq, ataatsimut isigalugu inatsimmi procentit taaneqartut naammassisinnaaniassagakkit.

Ileqqaarnissamut tunngaviusoq Soraarnerussutisiaqalernissamut akileeqataasut minnerpaaq
100.000 kr. ataallugit Soraarnerussutisiaqalernissamut ileqqaarnissaq piumasaqataanngilaq
100.000 aamma 150.000 kr. akornanni Ileqqaarnissamut tunngaviusup 0 aamma 4 %-iata akornanni
150.000 kr. sinnerlugit Ileqqaarnissamut tunngaviusup 4 %-ia
   
Akileeqataanissamut piumasaqaatit annertussusiat ukiut tamaasa 1 procentpointimit qaffanneqartassaaq 10 %-ip angunissaata tungaanut

 

Novembarip 25-iani 2020 Inatsisartut soraarnerussutisiassanut katersisussaatitaanermut inatsit allanguiffigivaat, 2020, 2021 aammalu 2022-imi katersisussaatitaanermut procenti assigiiginnartussaatillugu.  

 

Inuk aningaasarsiaqartoq ileqqaarnissamut tunngaveqaruni 300.000 kr.-nik qanoq annertutigisumik soraarnerussutisiaqalernissamut akiliuteqartassava.

Ukioq 2018 2019 2020 2021 2022 2023 2024 2025 2026 =>
Procenti 4 % 5 % 6 % 6 %  6 % 7 % 8 % 9 % 10 %
Ukiumut ileqqaakkat kr. 12.000 15.000 18.000 18.000 18.000 21.000 24.000 27.000 30.000
Qaammammut ileqqaakkat kr. 1.000 1.250 1.500 1.500 1.500 1.750 2.000 2.250 2.500

 

Qaammammoortumik akileraarutinut ilanngaatip 42 %-ip kingornatigut qanoq paasisariaqarpa

Ukioq 2018 2019 2020 2021 2022 2023 2024 2025 2026 =>
Qaammammut ileqqaakkat kr. 580 725 870 870 870 1.015 1.160 1.305 1.450

 

 

Inuussutissarsiummik suliffeqarfik namminersortoq

Illit namminersorlutit inuussutissarsiummik ingerlatsiguit soraarnerussutisiaqalernissamut akileeqataasutit sinneqartoorutit akileraarutigineqartussat tunngavigalugit naatsorsorneqassaaq

Iluanaarutit akileraarutaasussaasut Soraarnerussutisiaqalernissamut akileeqataasut minnerpaaq
100.000 kr. ataallugit Soraarnerussutisiaqalernissamut ileqqaarnissaq piumasaqataanngilaq
100.000 aamma 150.000 kr. akornanni Sinneqartoorutivit akileraarutaasussap 0 aamma 2 %-iata akornanni
150.000 kr. sinnerlugit Sinneqartoorutivit akileraarutaasussap 2 %-ia
   
Akileeqataanissamut piumasaqaatit annertussusiat ukiut tamaasa 1 procentpointimit qaffanneqartassaaq 6 %-ip angunissaata tungaanut

 

Novembarip 25-iani 2020 Inatsisartut soraarnerussutisiassanut katersisussaatitaanermut inatsit allanguiffigivaat, 2020, 2021 aammalu 2021-imi katersisussaatitaanermut procenti assigiiginnartussaatillugu.  

 

Inuk namminersortuulluni inuussutissarsiummik suliffiuteqartoq akileraarutaasussamik 300.000 kr.-nik sinneqartooruteqaruni soraarnerussutisiaqalernissamut qanoq annertutigisumik akiliuteqartassava:

Ukioq 2018 2019 2020 2021 2022 2023 2024 =>
Procenti 2 % 3 % 4 % 4 % 4 % 5 % 6 %
Ukiumut ileqqaakkat kr. 6.000 9.000 12.000 12.000 12.000 15.000 18.000
Qaammammut ileqqaakkat kr. 500 750 1.000 1.000 1.000 1.250 1.500

 

Siden er opdateret 13.01.2021

Siunnersuineq ilitsersuinerlu

Nangaassuteqarnak uagutsinnut attaveqarsinnaavutit.

Telefonigut ullut tamaasa ammasarput piffissami 10 - 14 (GMT-3), kiisalu uagutsinnut mailimik nassiussinissannut aammattaaq periarfissaqarputit.

Mailit paasissutissanik inummut tunngasunik mianerisassaasunik imaqarpat, taava qinnuigissavatsigit una atoqqullugu attaveqarnermi immersugassaq.