Oqaluttuassartarput naalisarlugu

1994-imi marsip ulluisa qulingiluaannili isumaqatigiissutigineqarpoq SIK-p, Finansministeriap aamma Naalakkersuisut akornanni ataatsimoortumik isumaqatigiissutaat naapertorlugit atorfeqartunut soraarnerussutisiaqarnissamut aningaasaateqarfiliortoqarnissaa.  

Soraarnerussutisiaqarnermut aningaasaateqarfiup atuutsinneqalernerani siunertaatinneqarpoq aningaasaateqarfik nunatsinniissasoq, aammalu ilaasortanut periarfissiissasoq siusinaarluni sulisinnaajunnaarnersiuteqalernissamut, angajoqqaamillu aapparisamilluunniit annaasaqarsimasunut pisartagaqalernissamut periarfissiilluni.

Kisianni ukiut tallimat qaangiuttullu – sivisuumik aamma ilungersunartumik isumaqatigiinniareernermi – SISA Finanstilsynet-imit akuersissummik tunineqarmat ataatsimeersuarnermi pilersitsiffiusumi ullormi 1. juuli 1999-imi piviusunngortinneqarpoq.

Ukiuni 1994 – 1999 SISA pilersinneqarnerup nalaaniimmat ilaasortat soraarnerussutisiassatut akiliutaat GrønlandsBANKENimit isumagineqarput, taamaallaallu katersineq ingerlanneqarluni sillimmasiinermut matussutissartaqanngitsunik.

1999-imi SISA soraarnerussutisiaqartitsinermut aningaasaateqarfittut namminersortutut pilersinneqarmat, siunertarineqartoq siusinaarluni sulisinnaajunnaarnersiuteqalernissamut, angajoqqaamillu aapparisamilluunniit annaasaqarsimasunut pisartagaqalernissaq piviusunngortinneqarpoq.

Ukiuni 1999-imiit 2016-imut taamaallaat SIK-p isumaqatigiissuterpassui assigiinngitsut malillugit atorfeqartutut akissarsiallit SISA-mi ilaasortaapput.

2016-imi SISA-mi siulersuisut aaliangerput ilaasortanngorsinnaaneq ammaanneqassasoq isumaqatigiissutini allaniittunut, allanullu sulisartunut kattuffiit avataatigooraluartunut assingusunik atugassartitaasunik atorfilinnut.

SISA Kalaallit Nunaanni ilaasortanit pigineqarluni soraarnerussutisiassanik aningaasaateqarfiuvoq, suliassaraalu soraarnerussutisiassanik aaqqissuussinernik pilerinartunik kattuffinnut aamma inuussutissarsiornermik Nunatsinni ingerlatsisunut sapinngisamik pitsaanerpaanik erniortitsilluni katersiviusoq aamma appasinnerpaamik aarlerinaateqarfiusumik katersiviusoq. SISA 41.000 -it missaani ilaasortaqarpoq, taakkunannga 20.000-it ataavartumik akilioraasuullutik. SISA ukiumut soraarnerussutisiassatut katersatut 300 mio. kr.-inik  toqqorteriffigineqartarpoq aamma soraarnerussutisiassatut katersanik 5 milliaartit angullugit erniortitarai.

SISA 1999-imi SIK-p kattuffianut attuumassutilinnut atorfilinnuinnaq soraarnerussutisiaqalernissamut aningaasaateqarfittut pilersinneqarpoq, ullumikkulli soraarnerussutisiaqalernissamut katersineq neqeroorutigisinnaalernikuuaa apeqqutaanani sutut imaluunniit sumi atorfeqarnersut sulisartut. SISA-p allattoqarfia Nuummiittoq ilaasortanik kalaallisut qallunaatullu sullissisuuvoq.

Opdateret 25.08.2023

Malittarisassaatigut