Nakorsatut siunnersortimik pissarsiorpugut, peqqissutsimut paasissutissat naapertorlugit nalilersuinermi ikiuussinnaasumik – ilanngullugit nappaatit suussusiannik paasinnissimanermut tunngassutilinnik  – naliliineq siunertaralugu sillimmasiinissaq aammalu sillimmammiik tunniussinissamut ukunanngaaniit:

• Sulisinnaassutsimik annaasaqarnermi sillimmat,
• Nappaatinut Perulunnartunut sillimmat
• Toqukkut qimagunnermi sillimmat

Takorloorparput

• Nuummi najugaqartutit
• Kalaallisut qallunaatullu oqaaseqartuusutit
• Nakorsatut sulinermi ilisimasaqarluartuusutit soraarnerussutisiaqalernissamullu sulinermi sulianik naliliisinnaasutit.

Sulianik  nalilersuinissaq allaffitsinni nuummi ilaasortanik sullissisut suleqatigalugit pissaaq – ilimanarsinnaavoq sapaatip akunneranut ullup affaanik sivisussuseqarsinnaasassasoq – nikerarsinnaasassappulli.

Atorfinitsinneqarnermut isumaqatigiissut akissarsiaqarnissarlu immikkut isumaqatigiissutigineqassapput, tiimimusiaqartinneqassaarlu.

Atorfik inuttalerneqarnissaa kissaatigaarput kingusinnerpaamik pissasoq 01.12.2024 siusinnerusinnaallunili.

SISA Pension pillugu

SISA Kalaallit Nunaanni ilaasortanit pigineqarluni soraarnerussutisiassanik aningaasaateqarfiuvoq, suliassaraalu soraarnerussutisiassanik aaqqissuussinernik pilerinartunik kattuffinnut aamma inuussutissarsiornermik Nunatsinni ingerlatsisunut sapinngisamik pitsaanerpaanik erniortitsilluni katersiviusoq aamma appasinnerpaamik aarlerinaateqarfiusumik katersiviusoq. SISA Pension pilersinneqarpoq 1999-mi nunatsinni soraarnerussutisiaqalernissamut aningaaserivittut Nuuk-mi inissisimasuulluni. Ilaasortavut kalaallisut, qallunaatut tuluttullu sullittarpagut. Ilaasortaqarpugut 43.200 missaani amerlassusilinnik, taakkunanngalu  massakkut affaata missai akilioraasuupput. SISA ukiumut soraarnerussutisiassatut katersanik 386 mio. kr.-inik  toqqorteriffigineqartarpoq aamma soraarnerussutisiassatut katersat 5,5 milliaardit angullugit erniortitarai.

Anguniagaraarput ilaasortanik sullissisarfik suli nukittunerusoq Nuummi  pilersinneqassasoq aammalu allaffissornermut suliassat akisussaaffiillu annertunerusut Nunatsinni ingerlatilernissaat. Tamanna anguniarlugu nakorsamik siunnersortimik pissarsiorpugut.

Atorfimmut tunngasunik apeqqutissaqaruit, tikilluaqqusaavutit ingerlatsinermut pisortaq (COO) Michael Linfos attavigissallugu normumi +299 538789 imaluunniit email ml@sisa.gl