Akileraarut qanoq paasineqassava?

SISA Nunatsinni kisiartaavoq soraarnerussutisiassanik katersivittut ataatsimoortumik soraarnerussutisiassanik aaqqissuussinermik neqorooruteqartoq, sillimmasiinermik matussusiisinnaasoq aamma soraarnerussutisiassanik toqqortuiviusinnaasoq, toqqortikkatullu akiliutit tamarmik akileraarummut ”ilanngaat”-aasinnaassallutik aamma isertitatut akileraarutissatut tunniunneqalerneranut aatsaat akileraaruserneqartussanngorlugit aaqqinneqartarlutik.

Akileraarummut ”ilanngaat”-itut inissiinissaq marlunnik periarfissaqarpoq:

• Sulisitsisumit akilerneqarnerata nalaani ilanngutinngikkallarsinnaanerat

Ilanngutinngikkallarsinnaanerat isumaqarpoq soraarnerussutisiaqalernissamut katersanut toqqortuilluni akilioraanerup nalaani akiliutit akissarsarsiorluni isertitanut, ukiumi isertitanut, ilanngunneqarneq ajormata. Taamaalilluni Akileraarnermut ingerlatsivimmiit isertitatut ilanngunneqarneq ajorput aatsaalli tunniussuunneqalernerata nalaani isertitatut akileraaruserneqartussanngortinneqartarlutik.

• Nammineerluni akilioraassutit ILANNGAATIGINEQARSINNAANERI

Aallaaviusoq tassaavoq isertitanit tamanit akileraartoqartussaammat. Taamaattorli periarfissaavoq soraarnerussutisiassanut toqqortatut akiliutit isertitanit ilanngaatigineqarsinnaaneri aamma isertitatut akileraarusernissaat tunniunneqarnissaata nalaannut kinguartinneqarsinnaanerat.

Maluginiassavat akiliutigisimasannut taakkununnga ilanngaat akileraaruteqaataasussanit ilanngaataammat taakkulu akileraaruteqaataasussanit ilanngaatitit allat ilanngullugit nalilissavat ilanngaat aalajangersimasoq imaluunniit akileraaruteqaataasussanit ilanngaatit tamarmiusut nalingat arlaat atorniarnerlugu.

Soraarnerussutisiassatut isertitanit tamakkiisuniit annerpaamik 20 % ilanngaatigineqarsinnaavoq.

Nunatsinni isertitanit akileraarut assigiippoq, isertitat qanorluunniit annertutigigaluarpata. Taamaattumik akileraarutit eqqarsaatigalugit apeqqutaanngilaq soraarnerussutisiassanit akileraarneq toqqortuilluni akiliinerup nalaani pigaluarpat taamaalillunilu tunniunneqarnerisa nalaani akileraaruserneqarani - imaluunniit soraarnerussutisiassatut toqqortuilluni akilerneqarnerisa nalaanni isertitanit ilanngaatigineqarpata aammalu tunniunneqarnerisa nalaani isertitatut akileraaruserneqarlutik.

Assersuut

Takusigu Visse Kritiske Sygdomme / Perulunnartumik Nappaateqarnermi tunniussineq 100.000 kr.-inik aningaasartalik, ilaasortamut Kommuneqarfik Sermersooq-imi najugaqartumut. Kommunimi tassani akileraarnermut procenti 42 %-iuvoq.

Visse Kritiske Sygdomme / Perulunnartumik Nappaateqarnermi sillimmasernermi 100.000 kr. matussusiisussaq sillimmaserfiginerani qaammammut akiliuteqarpoq 74,20 kr.-inik.

Soraarnerussutisiassanik aaqqissuussineq akileraartussaatitaaffilik.

Qaammammut sillimmasernermut akiliuteqartarputit 74,20 kr., sillimmasernermulli akiliutit akileraaruserneqarneq ajormat sillimmasernermut akiliutit taamaallaat akileraareernermi qaammammut 43,04 kr.-iuvoq. Napparsimalersimaguilli nappaatigilikkallu sillimmaserninnit matussuserneqarsinnaatitaalluni taava akileraareernerup kingorna tunniunneqassapput 58.000 kr.

Soraarnerussutisiassanik aaqqissuussineq akileraarutitaqanngitsoq.

Nappaateqalersimaguit sillimmaserninnit matussuserneqarsinnaasumik, aningaasallu taakkua tigussagukkit (58.000 kr.), akileraartussaatitaaffiunngitsumilli sillimmateqarlutit, toqqarsinnaavat 58.000 kr.-inik matussusiisussamik sillimmaserneq. Taanna qaammammut 43,04 kr.-inik akeqarpoq, kisianni soraarnerussutisiassatulli aaqqissuussinerit akileraarutitaqassanngimmat sillimmaserninnut akiliutit ilanngaatigisinnaassanngilat, taamaattumillu sillimmaserneq taanna 43,04 kr.-inik akileraareerluni akeqarpoq.

Takussutissiaq:

Eqikkaalluni inernera imaappoq, akileraareerlutit sillimmaserninnit tunniunneqartussat assigiissapput, akileraartussaanngikkuit akileraartussaaguilluunniit