.... SISAmi ilaasortatut Nappaatit Perulunnartut Ilaannut sillimmateqarnissat ilimanaateqarluartoq.

Nunatsinni innuttaasut ullumikkut amerlasuut nappaatit perulunnartut ilaannik nappaateqartutut nalunaarneqarsimagunik sillimmarsernerminnit pissarsiaqartinneqarsinnaapput. Naappaat  perulunnartoq assersuutigalugu tassaasinnaavoq kraftimik nappaat, qaratsakkut aanaartoorneq, milittoorneq imaluunniit nappaat alla inuunermut navianartorsiortitsisinnaasoq sillimmasernermi piumasaqaatit ilaattut nalunaarsukkanut ilaasoq.

Sillimmasernermut matussusiineq nalinginnaasumik soraarnerussutisiassanut aaqqissuussinermut ilaatillugu aaqqinneqarsimasarpoq. Nunatsinni aaqqiinerit tunngaviusumik imaapput sulisitsisut tassaasarluni soraarnerussutisiassannut katersininnut akilioraasuusartoq. Imaassinnaavoq isumaqatigiissummut aalajangersimasumut atasumik atorfeqartitaasutit imaluunniit sulisitsisut sulisorisaminut atasumik soraarnerussutisiassat pillugit suliffeqarfittut isumaqatigiissuteqarsimasoq. Aamma imaalluarsinnaavoq illit nammineq soraarnerussutisiassatit pillugit aaqqissuussinermik pilersitsisimasutit tassungalu sillimmasersornerit ilaatillugit.

Soraarnerussutisiassanut aaqqissuussivigisat SISA-simappat

Nunatsinni SISA tassaavoq soraarnerussutisiassanik aaqqissuussinernik neqorooruteqartuni annersaasoq aamma soraarnerussutisiassanik sullissisuusoq 40.000 missaani amerlassusilinnik ilaasortaqartoq. SISA-mi ilaasortat 30.000-it missaaniittut nappaatit perulunnartut ilaannut soraarnerussutisiassanut ilaasumik sillimmaserneqarnikuupput.

Sillimmat taanna pillugu uagutsinnut atasumik Forenede Gruppeliv peqatiqalugu ineriartortitsisimavugut tassalu sillimmasernermut piumasaqaatini atuarsinnaavat nappaatit suut sillimmammit tassannga matussuserneqarnersut aamma nappaatip suussusilerneqarneranut piumasaqaataasut suunersut atuarneqarsinnaapput. Sillimmasiinitsinnut piumasaqaatit uani takuneqarsinnaapput: www.sisa.gl/saqqummersitat/sillimmasernermi-piumasaqaatit/

Soraarnerussutisiassannut aaqqissuussininnut tunngasumik paasissutissat sumi nassaarisinnaavakka

Internetikkut quppersakkami PensionsInfo.dk –imut NemID atorlugu isersinnaavutit takuniarlugu nappaatit perulunnartut ilaannut sillimmaserneqarsimanersutit. Tassanissaaq takusinnaavatit soraarnerussutisiassannut tunngasut allat, aamma takusinnaavat katersivimmi sumi soraarnerussutisiassannut aaqqissuussisimanerlutit.

Sillimmaserninniit tunniussisoqarnissaanik qinnuteqarneq

Pingaaruteqarpoq soraarnerussutisiassannut ingerlatsivik nappaatinut perulunnartunut sillimmaserfigisat attavigissagit.

SISA katersiffigalugulu sillimmaserfigisimagukku piaarnerpaamik attavigissavatsigut taamaalilluta sinnersorlutillu ilitsersorsinnaaniassagatsigit.

Qinnuteqarneq imak pissaaq, immersugassaq immersoriarlugu atsioriarlugulu, taava nakorsamiik napparsimalersimaninnut uppernarsaat takussutissartalik ilanngullugu SISAmut nassiunneqassaaq.

Nappaat perulunnaartuuppat sillimmammullu ilaalluni, sillimmammiik aningaasat illit kontomut ikineqarumaarput. Maluginiassavat SISAmiik sillimmatit tamarmik tunniunneqannginnermini akileraarutigineqaqqaartarmata.