Kalaallit Nunaanni pensionskasset annersaat, SISA, BankNordikilu pensionimut akiliutinik allaffissornikkut ingerlatsinermut isumaqatigiissusioqqammerput. Isumaqatigiissusiaq nutaaq pensionskassemut immikkut tulluarsagaavoq, taamaasillunilu SISA iluarnerusumik pisariinnerusumillu kiffartuunneqalerpoq. 

”SISA-p BankNordik sullissisussatut toqqarsimavaa, maannalu pensionskassemi ilaasortaasut tamarmik
soraarnermusianut akiliutaat BankNordikimit isumagineqartussanngorput. Taamatut sullissilernerput assut
naammagisimaarutigaarput. Ingerlatseqatigiiffitsinni Atlantikup Avannaani ukiuni 100-nik sinnilinni
aningaaserinikkut suliaqarsimavugut, taamaammat aningaaserinikkut kiffartuussinerit assigiinngitsut
tamaasa misilittagaqarfigilluarpavut, soraarnermusianik ingerlatsineq tamakkununnga ilaalluinnarpoq,”
Árni Ellefsen, BankNordikimi pisortaaneq oqarpoq.

Isumaqatigiissusiaq BankNordikip SISA-mut immikkut tulluarsarsimavaa, SISA-p ilaasortaasa
soraarnermusianut akiliutaannik ingerlatsinermi pensionskassep kissaatai pisariaqartitaalu aallaavigalugit
aaqqissuussaavoq. Taamaasillutik Kalaallit Nunaanni suliffeqarfiit 200-t SISA-mut pensionissamut
tapiissutinut akiliutitik BankNordik aqqutigalugu akiliutigisalertussanngorpaat.

”Aningaasartuutit qaffarujussuariataannginnissaat SISA-mi pingaartipparput. Siornatigut pensionimut
akiliutinik ingerlatseriaaserisimasatsinni aningaasartuutit qaffariapiloornerat paasigatsigu allamik
periarfissarsiortariaqarsimavugut,” Søren Schock Petersen, SISA-mi pisortaaneq oqarpoq, nangillunilu:
”Tassunga atatillugu BankNordik akiliinernik taakkuninnga ingerlatseriaasissamik nutaarluinnarmik
siunnersorpaatigut, nutaaliorlutik eqaannerusumik periuseqarnerat aqqutigalugu maanna akikinnerusumik
pitsaanerusumillu sullinneqalerpugut.”

Michael Linfosip, SISA-mi tuniniaanermi pisortap ima nangippaa: ”Isumaqatigiissusiaq nutaaq atorlugu
sulisitsisut sullitamik pensionissamut tapiissutitut akiliutaat ajornaannerusumik ingerlassinnaalerpaat,
aammattaarlu akiliinerit SISA-mut malinnaavigiuminarnerussallutik.”

Bankip SISA-llu isumaqatigiissusiaat pissutaalluni pensionissamut tapiissutit akiliutigineqartartut ukiumut
200 mio. kr.-it sinnerlugit nalillit ingerlanneqarnerat aningaasartuutitakinnerulissaaq.

”Sullissinitsinni sullitanut suleqatinulluunniit tulluarsakkamik kiffartuussinissaq assorsuaq
pingaartitaraarput, SISA-p suleqatiginerani tamanna aamma ilaalluinnarpoq. SISA-p pisariaqartitai
kissaataalu paasereeratsigit taakku aallaavigalugit sullissinissarput aaqqissuupparput,” René K. E. Sørensen,
BankNordikimi privatkundedirektøriusoq taama oqarpoq. Isumaqatigiissusiaq SISA-p
suleqatigilluarnissaanut tunngaviliunneqarsimasoq assut nuannaarutigaa.

Ingerlatsinermut isumaqatigiissusiaq nutaaq ulloq apriilip 1. 2019 atuutilerpoq, ukiormannalu novembarip
naanerani SISA-mut akiliutit tamarmik BankNordik aqqutigalugu piumaarput. ”Sullissinermut nutaamut
ikaarsaarneq uatsinnut sulisitsisunullu ajornaatsuinnaanngilaq, taamaattorli SISA-mut
iluaqutissarpassuaqarpoq,” Pâviâraq Heilmann, SISA-mi allaffeqarfiup pisortaa oqarpoq. Isumaqatigiissut
SISA-p ilaasortaanut allannguutaanavianngilaq.