Nunatsinni Soraarnerussutisiassanik katersivik SISA assigiinngitsunik soraarnerussutisiassanik aaqqissuussinernik neqorooruteqarpoq, taamaattorli annertunerpaamik atorneqartoq tassaavoq ilinnut aamma SIK-ip isumaqatigiissutaanik atuisutut periarfissatit.

Taanna imaattunik periarfissaqartitsivoq:

Utoqqalinersiutit

Taakku 66-inik ukioqalerninniit – 2021-imiillu 67-inik ukioqalernerniit – soraarninngorsimaguit pisartagaqalersinnaavutit. Soraarninngornermi Inatsisartut inatsisaanni ukiorititaasoq malinneqarpoq. Tunniussuineq ingerlasarpoq sivikinnerpaamik ukiuni 10-ini, toqukkut tamanna sioqqullugu qimagutissagaluaruilluunniit.

Meerisanut sillimmat

Toqukkut qimagukkuit meeqqatit 24-inik ukioqalernissaasa tungaannut pisartagaqalernissamut periarfissaqartinneqarput.

 

Toqqortikkat qularnaarneqarnerat - Depotsikring  

Soraarnerussutisiaqalernissaq sioqqullugu toqukkut qimagunnermi toqqortikkat tamarmik ilaquttannut qaninnernut imaluunniit kingornussisussanngortitannut tunniunneqassapput. Kingornussassanngortitsineq pillugu attavigisinnaavatsigut.

Sulisinnaassutsimik annaasaqarnermi pisartagaqalertoqarsinnaavoq

Pisortat siusinaartumik soraarnerussutisiaqartitsisarneranni qaffasinnerpaamik soraarnerussutisiaqarsinnaatitaanissannik akuerippatsit, aningaasanik napparsimalernerit sioqqullugu qaammanitini kingullerni 24-ini qaammammut akiliutigisartakkappit agguaqatigiissinnerisa amerlaqataannik pisartagaqarsinnaatitaavutit.

Perulunnartumik napparsimalersinnaanermut sillimmaserneq

SISA-mi 5.000 kr. qulaallugu katersaqaruit nappaatinut perulunnartunut sillimmaserneqarputit. Tamanna ilinnut imatut isumaqarpoq nappaammik perulunnartumik matussusigaasunik nappaateqaleruit akileraarutit sioqqullugit 100.000 kr.-nik tunineqassagavit. Soraarnerussutisiassatut toqqortikkat akileraarutinut ilanngaatigineqarsinnaammata tunniussilernermi akileraarutinut ilanngaaffigineqassapput.

 

Sillimmaserneqarneq taanna soraarnerussutisiassanut katersinermi aaqqissuussinermut ilanngunneqarpoq 1. oktober 2018, taamaammat sillimmammut tassunga matussuserneqartut taamaallat ulloq taanna kingoqqullugu nappaatigilikkanut matussusiisinnaavoq. Sillimmasernermit tassannga pissarsisussaaguit katersatit kalluarneqassanngillat.

Annertunerusumik piumasaqaatinut tunngasunik paasisaqarusukkuit quppersakkatsinni www.sisa.gl –imi atuarsinnaavatit. Tassanissaaq paasissutissat atuarsinnaavatit katerseriaatsinut allanut tunngasut, sulisartunut SIK-ip isumaqatigiissuteqarfigisimasaasa avataani suliffeqartunut tunngassuteqartunut atuuttut.

 

Attavigisinnaavatsigut telefoni 32 40 22 atorlugu imaluunniit e-mail-erfigisinnaavatsigut sisa@sisa.gl atorlugu. Paasissutissanik eriagisassanik nassinniarutsigut – assersuutigalugu cpr.nr. – ugguuna https://www.sisa.gl/dk/kontakt/ nassikkutsigut pitsaanerussaaq.