Nunatsinni aalisarnermik ingerlatsinerup iluani piginneqatigeeriaaseq nutaaq atuutilerpoq.

Ukiuni qulikkaani amerlasuuni aningaasaqarnerup patajaallisarneranik aningaasaliissuteqartarnernillu ingerlatsereernermiit, piginneqataasut amerlinerinut – inuunermi pitsaasumik naammassisaq inuiaqatigiinnut iluaqutaasoq

Nunatsinni inuussutissarsiuteqarnermi immikkoortoq nutaaq aallartippoq. 2025-mi oktobarip aallaqqaataani atuutilersumik Polar Seafood Greenland A/S-imi piginneqatigiissutit 5%-ii SISA Pensionip pigilissavai, suliffeqarfissuullu oqaluttuarisaanerani avataanit piginneqataalersutut siullertut inississalluni. Piginneqatigiilersullu naatsorsuutigaat ukiut ingerlanerini suliffeqarfissuup piginneqatigiissutai aamma suli 5%-it SISA-p pigilissagai.

Nunatsinni soraarnerussutisiaqalernissamut katersallit 44.000-nit amerlanerit taamaasillutik nunatsinni suliffeqarfiit namminersortut annersaanni piginneqataalerput. Piginneqatigiiffiullu maannamut ilaqutariinnit marlunnit pigineqartup piginnittuinik allannguineq, inuiaqatigiinni piujuartitsineq tunngavigalugu ingerlatsinerup aammalu aningaasaqarnerup nukittorsarneranut sunniuteqassaaq.  

”SISAmi aningaasaliinerup iluanaarutissartai kisiisa eqqarsaatiginagit – nunatsinni suliffeqarfiit qulakkeernissaat aammalu nunatsinni inuussutissarsiutit pingaarnersaata nukittorsarnissaa kiisalu ilaasortatsinnut piginneqataatitsinissaq periarfissikkumavarput. Polar Seafood Greenland A/S nunatsinni aalisarnermi annertuumik pingaarutilittut inissisimavoq, suliffeqarfiullu taassuma suli ineriartortuarnissaanut suleqataasinnaanerput tulluussimaarutigaarput.” Jess G. Berthelsen, SISA Pensionimi siulersuisunut siulittaasoq oqarpoq.

”Aningaasaliinissamik aalajangerneq Polar Seafood Greenland A/S-ip sukumiilluinnartumik misissuiffigereerneratigut pivoq, iluanaarutissatullu naatsorsuutigisat eqqarsaatigalugit tamanna aningaasaliinerup aarlerinaateqarsinnaaneranut naapertuuttoq SISA-mit nalilerneqarpoq. SISAmmi  aningaasaliissuteqartarnera ilaasortat aningaasaataat ataqqillugit nalilersuilluni suliaqarnikkut pisarpoq.”  SISA Pensionimi pisortaaneq Søren Schnock Petersen oqarpoq.  

 

Aalisarnermik ingerlatsineq ineriartortuarlunilu allanngorartuartoq inuiaqatigiinni annertuumik pingaaruteqarpoq. Piginneqatigiilernerup nunatsinni ilaatigut suliffissat aammalu tunitsiveqarnermut periarfissat qulakkeerinniffigeqataaffigissavai. Nunatsinni aalisarnermik ingerlatsinermi ataatsimoorussamik naleqartitat anguniakkallu SISAp piginneqataalerneratigut nukittorsarneqassapput.

” SISA ingerlatatsinnut piginneqataalernerani nuannaarluta tikilluaqqungaarparput. Aalisarnermut inatsit nutaaq ilungersuullugulu pimoorupparput, SISA-millu piginneqateqalernerup nassataanik ataatsimoorluta nunatsinni pisuussutitta suli amerlanernit iluaqutigineqalernissaannut aqqutissiueqataavugut.  Nunatsinni aalisarnermik ingerlatsinerup suli nukittorsarnissaanik nalittorsarnissaanillu ineriartortuarnissamik anguniagaqarnitsinni piginneqateqalernerput siunissamut isumalluarfigaarput.”  Polar Seafood Greenland A/S-imi pisortaq Bent Salling oqarpoq.

”Polar Seafoodimik pilersitsisut aammalu suleqatigisartakkagut qutsavigingaarpavut, minnerunngitsumik maannakkut sulisuusut siusinnerusukkullu sulisorisimasat. Taakkumi tunniussimallutik, nukittullutik aammalu tatiginassuseqarlutik suliuarnerat suliffeqarfiup ullumikkut patajaatsumik nalittoriartortuarmillu inissisimaneranut pissutaaqataapput. Kingornussatta nukittuup inissisimalluartullu ineriartorteqqinnissaanut massakkut siunissaq ammaanneqarpoq  –   SISA Pension aammalu sulisugut tunniusimasut peqatigalugit ingerlaqqissaagut. Polar Seafood Greenland A/S-mi pisortaq Miki Brøns oqarpoq

SISA Pensionimut paasissutissat

SISA Nunatsinni soraarnerussutisiaqalernissamut aningaasaateqarfiuvoq 44.000-t sinnerlugit ilaasortaqartoq. SISA ilaasortami aningaasaataasa tutsuiginartumik inissinnissaannik qulakkeerinerup saniatigut inuiaqatigiinni aammalu nunatsinni innutaasunut ineriartuutaasussanik akisussaassusilimmik aningaasaliissuteqartarpoq. SISAp DKK 6,5 milliard-it aqutaraai, ilaasortalu soraarnerussutisiaqalernissamut ukiumut DKK 400 million-it sinnillit akiliutigisarpaat. 

Polar Seafood Greenland A/S-mut paasissutissat

Polar Seafood Greenland A/S nunatsinni suliffeqarfiit namminersortunit pigineqartut annersaraat. Ingerlatseqatigiiffik 1984-mi pilersinneqartoq taamanimiit ineriartortuarluni maanna ukiumut milliardit sinnerlugit kaaviiaartitaqartoq, ullumikkut ilaatigut makkunannga pigisaqarpoq, kilisaatit aavataasiortut pisanillu suliareqqiiffiusartut arfineq pingasut, sinerissap qanittuani angallatit raajarniutit sisamat, sinerissap qanittuani angallatit assagiarsunniutit pingasut, nunami tunitsiviit /tunisassiorfiillu arfinillit aammalu sulisunut nunatsinni suliffeqartunut 600 missaanniittunut sulisitsisuulluni. Tamakku saniatigut suliffeqarfissuaq Norgemi, Islandimi Danmarkimilu ingerlataqarpoq