Naatsorsuutitigut angusat 2020-mi immikkoortuni arlalinni Soraarnerussutisiassanut katersivimmut SISA-mut pitsaasuupput. Soraarnerussutisiaqalernissamut akileeqataassutit malunnaateqarluartumik qaffapput, kiisalu aningaasaliissuteqarnikkut iluanaarutit ukioq tamakkerlugu naammaginarlutik, naak nunarsuaq tamakkerlugu nappaatip tuniluuttup COVID-19-imit pissuteqartup februaarimi aamma marsimi nalinik annertuumik annaasaqarnermik kinguneqaraluartoq.

Sillimmaserneqarnermut matusissutissanut akigitinneqartut appasinnerusut

Sillimmaserneqarnermut matusissutissanut aningaasartuutit naatsorsuutigineqartunit  appasinnerummata 2020-p aallartinnerani SISA Soraarnerussutisiat akinik appartitsisinnaavoq. Tamatuma kingunerisaanik nappaatit peruluutaasut ilaannut matussusiinermut akit appasinnerupput ilaasortanut SIK-p isumaqatigiissutai tunngavigalugit soraarnerussutisiaqalernissamut aaqqissuussinermut ilaasunut, taamatuttaaq aamma ilaasortanut suliffeqarfimmi soraarnerussutisiaqalernissamut aaqqissuussinermut ilaasunut.

Toqunermut atatillugu aamma sulisinnaanermik piginnaassuseqarnermik annaasaqarnermi suliffeqarfimmi soraarnerussutisiaqalernissamut aaqqissuussinermi akit aammattaaq appartinneqarput, sulisunut SIK-p isumaqatigiissutai tunngavigalugit aaqqissuussinermut ilaasunut meeqqat soraarnerussutisianut akit aammattaaq appartinneqarput, tamatumunnga ilutigitillugu ukiumoortumik pisartakkat 5.000 kr.-nit 6.000 kr.-inut qaffatsinneqarlutik.

 

Sulisunut SIK-p isumaqatigiissutaaniittunut sillimmaserneqarnermi matusissutissat annertusineqarput

Manna tikillugu ilaasortaq utoqqalinersianik suli pisartagaqalernani toquppat ilaasortap ileqqaagai qimataasunut tunniunneqartarput. Tamatuma saniatigut meeqqanut qimataasunut 24-t inorlugit ukiulinnut soraarnerussutisiaqartitsisoqartarpoq.

Matusissutissat taakkua marluk allanngornatik ingerlaannassapput, kisianni 1. januaari 2021 aallarnerfigalugu sulisunut SIK-p isumaqatigiissutaaniittunut soraarnerussutisiaqalernissamut aaqqissuussinermi sillimmaserneqarneq annertusineqarpoq. Ilaasortap soraarnerussutisiaqalernissamut ileqqaagai 5.000 kr.-nik amerlaneruppata, taava maannakkut toqunermi qimataasunut immikkut 100.000 kr.-inik pissarsititsisoqassaaq. Tamanna nappaatit peruluutaasut ilaanut matusissutissat 100.000 kr.-nit, SISA Soraarnerussutisiat ilaasortanut taakkununnga 1. Oktobari 2018-imi atuutilersitaata, saniatigut pissarsiarineqassapput.

 

Taatuma saniatigut ilaasortat 10.000 kr.-nit sinnerlugit ileqqaagallit nappaatit peruluutaasut ilaannut, toqunermut aamma sulisinnaanermik piginnaaneqarnermik annaasaqarnermut matusissutissanik ilassutaasunik pisinissaminnut periarfissaqalissapput. Taamaaliornikkut soraarnerussutisiaqalernissamut aaqqissuussinermi ilaasortat ataasiakkaat SIK-p isumaqatigiissutaaniittut periarfissaqalissapput namminneq sillimmaserneqarnermut matusissutissatik aaqqissuussinnaallugit, ilaasortap nammineq immikkut pisariaqartitani tunngavigalugit.

Soraarnerussutisiassanudt katersivik SISA piareersimavoq ilaasortanik periarfissat nutaat pillugit paasisaqarnerorusuttunut siunnersuinissaminut aamma ilitsersuinissaminut. Tamakku pillugit aammattaaq soraarnerussutisiaqalernissamut aningaasaateqarfiup nittartagaani atuartoqarsinnaavoq.

 

Soraarnerussutisiaqalernissamut akileeqataassutit akilerneqartut

Soraarnerussutisiassanut katersivimmut SISA-mut akiliutigineqartut 2020-mi malunnaateqarluartumik amerlipput. Soraarnerussutisiassanut katersiviup SISA-p katillugit pissarsiarai 355,2 mio. koruunit soraarnerussutisiaqalernissamut akileeqataassutitut aamma nuunneqartutut, tamanna 2019-imi 43,0 % sinnerlugit annertuneruvoq, taamani akiliutigineqartut 248,4 mio. koruuniupput.

Amerleriaatinut taakkununnga pissutaasut ilagaat akileeqataassutit siulliit  Akileraartarnermut Aqutsisoqarfimmit soraarnerussutisiaqarnissamut aaqqissuussinermut pinngitsoorani ilaanissaq pillugu inatsit tunngavigalugu akilersinneqartut. Tamatuma saniatigut SIK-p isumaqatigiissutinik isumaqatigiinniarnera naammassineqarpoq soraarnerussutisiaqalernissamut akileeqataassutit qaffanneqarlutik 1. apriili 2018-imit atuutilersumik. Tamatuma kingunerisaanik immikkut ittumik akiliuteqartoqarpoq.

Naatsorsuutini allanneqartut taakkua marluk iluarsiiffigigaanni suli ingerlaavartumik akileeqataassutit tunngaviusumik amerliartorput 19 %-t missaanni.

Soraarnerussutisiassanik katersivimmit SISA-mit nalilerneqarpoq ingerlaavartumik akileqataassutit qaffakkiartornerannut pissutaasoq soraarnerussutisiaqalernissamik soqutigineqarnerulernera, kiisalu soraarnerussutisiaqarnissamut aaqqissuussinermut pinngitsoorani ilaanissaq pillugu inatsimmi piumasaqaataasut. Akileraartarnermut Aqutsisoqarfimmit soraarnerussutisiaqalernissamut akileeqataassutinik akileeqqusaanissaq pinngitsoorniarlugu suliffeqartut aamma sulisitsisut amerliartuinnartut isumagisarpaat, ukiup ingerlanerani soraarnerussutisiaqalernissamut akileeqataassutinik naammattunik akiliisarnissaq. 

 

Sillimmasiinermut matusissutissat akilerneqartut aamma soraarnerussutisiat tunniunneqartut

Ilaasortanut aamma taakkunannga toqukkut qimataasunut tunniunneqartut siornatut suli malunnaatilimmik amerliartorput 2020-mi 59,7 mio. koruuninik amerlassuseqarlutik, tamanna 2019-imut sanilliussilluni 24,7 %-imik amerleriarneruvoq. Qaffariaammut pissutaasoq annertunerpaaq tassaavoq sillimmaserneqarnermut matusissutissanut taartisiassatut akilerneqartut, tassa ukiuni kingulliunerusuni soraarnerussutisiaqalernissamut aaqqissuussinermut attuumassuteqalersimasutigut. 

 

Aningaasaliissuteqartarnermi iluanaarutit

Nunarsuaq tamakkerlugu nappaat tuniluuttoq februaarimi aamma marsimi nalitigut (kurs) annertuumik annaasaqartitsivoq, kisianni tamatuma kingornatigut annaaneqartut anguneqaqqipput aamma taakkua qaangerlugit. Katillugit iluanaarutigineqartut soraarnerussutisiassanit aningaasaatit ilaasa akileraaruserneqarnissaannut akileraarutit sioqqullugit 2020-mi 297,7 mio. koruuniupput, tamannalu naammaginarluinnarpoq. Iluanaarutigineqartut ilaasortat ileqqaagaannut toqqaannartumik ilanngunneqassapput, tamatuma kingunerisaanik ilaasortat soraarnerussutisiaqalernissamut ileqqaagaat katillugit 296,9 mio. koruuninik amerleriarput.

Pigisanit pissarsiat ilaasa akileraaruserneqartarnerat 1. januaari 2018 aallarnerfigalugu Kalaallit Nunaanni atuutilerpoq. Tamatuma kingunerisaanik aningaasaliissuteqarnerni iluanaarutit 2018-imit 15,3 %-imik akileraaruserneqartalerput. Taamatuttaaq maleruaqqusat assingi soraarnerussutisiaqalernissamut aaqqissuussinernut nunani allani soraarnerussutisiaqalernissamut ingerlatsivinnut aamma Kalaallit Nunaanni aningaaserivinnut atuupput. 1. januaari 2021 SISA Soraarnerussutisiassat Nunatta Karsianut 43,6 mio koruuninik soraarnerussutisiaqalernissamut iluanaarutinik 2020-meersunit akileraarutinik akiliuteqarpoq.

 

Angusat aamma oqimaaqatigiissitsineq

Soraarnerussutisiassanik katersivimmut SISA-mut ilaasortat katillugit ileqqagaat 2020-p naanerani 4,3 mia. koruuninut amerlipput ukiumi siuliani 3,7 mia. koruuniullutik.

Aningaasaliissuteqartarnermi iluanaarutit il.il. ilanngunneqareerneranni ilaasortat soraarnerussutisiaqalernissamut ileqqaagaannut ilanngutereernerisa kingornatigut soraarnerussutisiaqalernissamut aningaasaateqarfik akileraarutit akilereerlugit 1,8 mio. kr.-inik sinneqartooruteqarpoq. Naatsorsuutitigut angusat  namminerisamik aningaasaatit 13,1 mio. kr.-inut amerlassuseqalersippaat. Pingaaruteqarpoq erseqqissassallugu Soraarnerussutisiassanik katersivik SISA tassaammat isumaqatigiissutit tunngavigalugu soraarnerussutisiaqalernissamut aningaasaateqarfik, tassani aammattaaq namminerisamik aningaasaatit ilaasortanit pigineqarlutik.

 

 

Attaveqarfissaq:

Pisortaaneq Søren Schock Petersen, e-mail ssp@sisa.gl, tlf. +299 38 40 31