Illisimaviuk?

Kvartalit tamaasa aningaasaliissutinik isumaginnittorisarput Danske Bank Asset Management peqatigalugu niuerfinni pissutsit pillugit oqaaseqaatit saqqummersittarpavut. Tassani allaaserisarpavut kvartalit siuliani erniortitassanik aningaasaliissuteqarnitsinni pissutsit suut sunniuteqartitsisarnersut – taamalu qanoq kvartalimi tulliuttumi ilimasuuteqarnersugut.

2021imi kvartalit 3-ni niuerfinni pissutsit pillugit oqaaseqaatit ataatsimut isigalugu takussutissat

NUNARSUAQ TAMAKKERLUGU ANINGAASAQARNERUP 2021-MI KVARTALIP AAPPAANI INERIARTORNERA: ammariartortitsinermi festi aallartivippoq

Amerikami aningaasarsiornermi ammaassiartorneq aallartilluaruttortoq tunillaannerusartoq Delta takkuppoq aasallu ingerlanerani taarsuup ataanut inissitsitsilluni. Taamaalilluni USA-mi tunillaassuineq aallarteqqippoq ingammillu naalagaaffiit kapitissimasunik ikinnerusunik innuttaasullit eqqorneqarput. Naak peqqinnissaqarfik naalagaaffinni aalajangersimasuni tatisimaneqaraluartoq, pisariaqarsimanngilaq – imaluunniit politikikkut kajumissuseqartoqanngilaq – killilersuinernik aallartitseqqinnissaq.

Naak taamaakkaluartoq tunillaassuunneq tamanna aningaasarsiornermut kinguneqarpoq, tassami inuit amerlasuut aammaarlutik mianersornerulermata, tamatumalu inuttaasunik sullissineq eqqorpaa. Tamatumunnga ilutigitillugu aningaasarsiornermi politikikkut kaammattuineq annikilliartorpoq, naak nioqqutissiornermik suliallit suli pilersuinermut aqqutinut tunngatillugu annertuumik suli tatisimaneqaraluartut. Tamatuma inerneraa aningaasarsiornikkut USA-mi annertusiartortitsinerup aasap ingerlanerani malunnaateqarluartumik annikinnerunera, upernariartornerani qaffasissutsinut annertuunut sanilliussilluni.

Taamaattorli aningaasaqarnermi ingerlatsineq annertusiartuinnarpoq aamma Amerikami aningaaserivissuaq (centralbank), Federal Reserve, septembarimi ataatsimiinnermi nalunaarpoq obligationinit pisiortornerup siullermeerluni annikillineqarnissaa takkutingajalersoq. Tamatumunnga pissutaanerpaavoq suliffeqarnerup 2021-p ingerlanerani assut siuariarsimanera. Kiisalu aningaasat pisissutaasinnaanerisa annikilliartornerata naatsorsuutigisamik qaffasinnerunera, aningaaserivissuup erseqqissarpaa naatsorsuutigalugu 2022-mi annikinnerujussuarmik aningaasat pisissutaasinnaanerat appasissasoq.    

Aningaasanik niuerfinni erniat malissiulaarput akerlianik aktiat rekordileeqqipput.

Taamaattoqarnera pissutigalugu kvartalit pingajuanni nunarsuaq tamakkerlugu aningaasaqarnermi pissutsit imaapput, tassani annertusiartortitsineq assut appariarpoq USA aamma Kina siuttoralugit. Annertusiartortitsinerup annikilliartornera siulliulluni takussutissaavoq aningaasat pisissutaasinnaanerisa nalikilliartornerat qaffasinnerpaaffissaminut killissimasoq, tamatuma kinguneraa juulip aamma augustip ingerlanerani erniat malunnaateqarluartumik apparnerat ingammik Tysklandimi. Tunillaassuunnerup annikilliartornera ilutigalugu ingammik USA-mi aamma Federal Reserve-p nalunaarutigimmagu obligationinik pisiortornerup 2022-mi aasap tungaanut atorunnaarsikkiartorneqassasut, taava erniat sivikitsumik atuuttartut aamma akunnattumik sivisussusilimmi atuuttartut kvartalip naajartornerani qaffapput. 

 

Aningaasarnikkut siuariartornerup ingerlaannartup aamma erniat appasinnerusut nunarsuaq tamakkerlugu aktiat qaffasinnerpaaffissaannut iluaqutaapput. Siuariarneq aatsaat juulimi unillatsiarpoq Kinamit nutaarsiassat tunngavigalugit, kisianni aktiat iluatseqqipput sivikitsumik malissiulaariarlutik rekordileeqqillutillu Europami taamatullu USA-mi, akerlianik aktiat niuerfinni nutaani sakkortuumik eqqugaapput ingammik Kinami. Septembarimi aammaarlutik nutaarsiassat Kinameersut nunarsuaq tamakkerlugu aktianik tatiseqqipput, kisianni septembarip naalernerani ilorraap tungaanut saaqqipput, kvartalilu tamaat isigalugu 2,5 procentit missaannik qaffallutik USA aamma Europa siuttoralugit.

 

Qaammatini aggersuni arfinilinnit – aqqaneq marlunnut aktiani niuerfiit ingasanngitsumik pitsaasuunissaat ilimagineqarpoq.

Nunarsuaq tamakkerlugu aktiat maannakkut ukiup aallartinneranit ullumimut 15 procentinik qaffassimapput aamma aasap ingerlanerani annertusiartortitsinerup annikillineranut sanilliussilluni pitsaanerusumik, naatsorsuutigisimasatsinnit ingerlapput. Naak taamaakkaluartoq massakkut uagut naliliivugut nunarsuaq tamakkerlugu aktianik niuerfinni siooranartut annersaat qaangiuttoq – annertusiartortitsinerup annikilliartornera maanakkut tamaanga killeqarpoq. Taamaattumik qaammatini aggersuni arfinilinni – aqqaneq marlunni aktiatigut ingasanngitsumik iluanaaruteqarnissaq takorloorparput.  

 

Uagut naliliinerput naapertorlugu europami aktiat pitsaanerpaasussatut isigaavut. Uagut nalilerparput europa tamakkerlugu aktianik niuerfiit – USA-mi aamma niuerfiit nutaat akerliannik – suli akimikkut nalilerneqarsimanerat appasittoq. Pitsaasumik annertusiartortitsinissamik naatsorsuutigisatta saniatigut aningaasat pisissutaasinnaanerisa appariartornerisa unikkiartornissaat, kiisalu aningasatigut politikkip assut sukanganngitsoq isiginiarlugit naatsorsuutigaarput ukiumi aggersumi 5 aamma 10 procent sinnerlugit erniaqartitsinissaq.

SISA-p aningasaliiffigisaani pissarsiat ineriartornerat

SISA Annertusiartortitsineq 2021

Kilde: Danske Bank Asset Management

SISA Annertusiartortitsineq

SISA Annertusiartortitsinerup ilaa Danske Bank Asset Managementimit ingerlan-neqartoq 2021-mi kvartalit pingajuanni pitsaasumik erniaqartitsiffiuvoq 0,60 %-itinik. Taamaalilluni kvartalit siulliit pingasut ingerlaneranni katillugit erniaqartitsineq 10,51 %-itiuvoq. Aktianut nuussiartorneq pingaarneq kvartalip naanerani 66 %-ip eqqaaniippoq, 32,4 %-t missaat obligationinut aningaasaliissutigineqarput taakkua saniatigut aningaasat tigoriaannaat ikittuinnaallutik.

SISA Aalaakkaasoq 2021

Kilde Danske Bank Asset Magement

SISA Aalaakkaasoq

SISA Aalaakkaasup ilaa Danske Bank Asset Managementimit ingerlanneqartoq kvartalit pingajuanni ajunngitsumik erniaqartitsiffiuvoq 0,46 %-imik. Taamaalilluni kvartalit siulliit pingasut ingerlaneranni katillugit erniaqartitsineq 3,36 %-tiuvoq.  Aktianut nuussiartorneq pingaarneq kvartalip naanerani 32 %-tip missaaniippoq, 61 %-tit missaat obligationinut aningaasaliissutigineqarput taakkua saniatigut aningaasat tigoriaannaat ikittuinnaallutik.

 

Aningaasaliissuteqarnitsinnut pilersaarut aamma tunngaviusumik aallaaviit taamalu ileqqorissaarnissamut malitassat immikkoortumik Aningaasaliissuteqarnerit –ni allaaserineqarput.

 

Qaammatit tamaasa kurs-it / aningaasat nalingi imaluunniit pigisat nalillit nalingisa ineriartornerat malinnaaffigisarpavut taamalu aningaasaliissuteqarnermi ataatsimut pissarsiat takussutissiarineqartarlutik uani Iluanaarut

 

Niuerfinni pissutsit pillugit oqaaseqaatit tamakkiisut – kvartalit 4-ni 2020-imi taamaallaat qallunaatuujusoq - takusinnavatit uani SAQQUMMERSITAT/Niuffaffinni tunngasunik oqaaseqaatit