Soraarnerussutisiaqalernissamut aningaasaateqarfimmi SISA-mi annertusiartortitsineq qaffasippoq aamma tamatumunnga ilutigitillugu soraarnerussutisiaqalernissamut aningaasaateqarfiup allaffissornermut aningaasartuutit aalaakkaasuutissimammagit periarfissaqalerpoq Soraarnerussutisiaqalernissamut Aningaasaateqarfimmi SISA-mi ilaasortat soraarnerussutisiaqalernissaminnut ileqqaakkaminnik uninngasuuteqarnerminnut akiliutigisartagaat appartissallugit.

Soraarnerussutisiaqalernissamut ileqqaakkat amerliartorput

Soraarnerussutisiaqarnissamut aaqqissuussinermut pinngitsoorani ilaanissaq pillugu inatsisip soraarnerussutisiaqalernissaq assut qitiutilerpaa, tamannalu SISA-mut kinguneqarpoq soraarnerussutisiaqalernissamut akileeqataassutaasut akilerneqartartut malunnaateqarluartumik qaffannerannik. Pisortaaneq Søren Schock Petersen naapertorlugu soraarnerussutisiaqalernissamut akileeqataassutit 2020-mi 19 procentimik qaffapput 2019-imut sanilliussilluni, tassa soraarnerussutisiaqalernissamut akileeqataassutit SISA-p 2020-mi Akileraartarnermut Aqutsisoqarfimmit pissarsiarisai ilanngaatigereerlugit. Annertusiartortitsineq 2021-mi ingerlaqqiinnarpoq taamaattorli qaffasissusia appasinnerulluni.  

Soraarnerussutisiaqalernissamut ileqqaagaqarneq silatusaarnerusoq takuneqarsinnaavoq, tamatuma inunnut ataasiakkaanut aamma inuiaqatigiit aningaasaqarniarneranut ajunngitsumik kinguneqarnera isigissagaanni, ineriartorneq assut nuannaarutissaavoq.

Soraarnerussutisiaqalernissamut Aningaasaateqarfik SISA ilaasortat kisiisa pillugit piuvoq

Soraarnerussutisiaqalernissamut Aningaasaateqarfik SISA aktialinnik imaluunniit allanit, agguagarsiaqartussanik piginnittoqanngilaq. Soraarnerussutisiaqalernissamut aningaasaateqarfiup iluanaarutai tamarmik tassaapput ilaasortat pigisaat. Taamaattumik SISA akiliutinik 1. januar 2021-mi appartitsivoq, kisianni 1. juli 2021 tikinneqaannartoq suli akiliutinik appartitseqqippoq. Taamaalillunilu suli soraarnerussutisiaqalernissamut aningaasaateqarfiup aningaasartuutinut soraarnerussutisiaqalernissamut ileqqaakkanit ilanngaatigisartagaasa aamma soraarnerussutisiaqalernissamut aningaasaateqarfiup allaffissornermut aningaasartuutigisaasa akornanni suli oqimaaqatigiittoqarpoq.

Ilaasortamut ataatsimut Soraarnerussutisiaqalernissamut Aningaasaateqarfik SISA soraarnerussutisiaqalernissamut akileeqataassutinik appartitsinera akiliuteqartartumut imatut kinguneqarpoq qaammatikkaartumik akiliut maannakkut 2021 tamakkerlugu agguaqatigiissitsilluni qaammammut 8,40 koruuninut appasissuseqalerluni. 2020-mi akiliut qaammammut 13,25 koruuniusimavoq.

Soraarnerussutisiaqalernissamut Aningaasaateqarfimmi SISA-mi ilaasortanut akilersuiunnaareersimasunut akiliut 2020-mi 4,50 koruuniniit agguaqatigiissitsilluni 2021-mi 3,20 koruuninut appartinneqarpoq, utoqqalillutik pensionisiallit 2020-imi 13,25 koruuninik akiliuteqartarput, maannakkut 2021-mi tamanna 10,40 koruuninut appartinneqarpoq.

Soraarnerussutisiaqalernissamut Aningaasaateqarfik SISA pillugit piviusut:

Soraarnerussutisiaqalernissamut Aningaasaateqarfik SISA ilaasortanit pigineqarpoq taamaattumillu aktiaatilinnut sinneqartoorutinik tunniussaqartussaanani. Anguniagaq tassaavoq ilaasortat orniginartumik soraarnerussutisiaqalernissamut aaqqissuussinermik peqarnissaannik qulakkeerinninnissaq iluanaarutit qaffasitsillugit aningaasartuutit appasitsillugit.

• Ilaasortat katillugit soraarnerussutisiaqalernissamut ileqqaagaat 31. december 2020-mi 4.263,9 mio. koruuninik amerlassuseqarput
• Soraarnerussutisiaqalernissamut akileeqataassutit 2020-mi akilerneqartut 355,2 mio. koruuniupput
• Ilaasortamut ataatsimut 2020-mi aningaasartuut 486 koruuniuvoq
• Nunatsinni suliffeqarfiit 200+ sulisumik soraarnerussutisiassaannik SISA-mut akiliisarput
• Soraarnerussutisiat aamma sillimmaserneqarnermi matusissutit ilaasortanut aamma taakkua qimataannut 2020-mi 59,7 mio. koruunit tunniunneqarput.